Press reliz

BMG we milli hyzmatdaşlar Türkmenistanda DÖM-leriň hasabatlylygy pugtalandyrmak maksady bilen duşuşyk geçirdiler

14 iýul 2026

Aşgabat, 2026-njy ýylyň 13-nji iýuly – Türkmenistandaky Birleşen Milletler Guramasynyň Hemişelik utgaşdyryjysynyň edarasy milli hyzmatdaşlar bilen bilelikde Durnukly ösüş maksatlarynyň (DÖM) käbir görkezijileri boýunça hasabatlylykda ýüze çykýan tapawutlary we boşluklary ara alyp maslahatlaşmak maksady bilen iş duşuşygyny geçirdi. Duşuşyga Saglygy goraýyş we derman senagaty ministrliginiň, Döwlet statistika komitetiniň hem-de Maliýe we ykdysadyýet ministrliginiň wekilleri gatnaşdylar. Duşuşygyň maksady 2030-njy ýyla çenli Durnukly ösüş boýunça Gün tertibiniň ýerine ýetirilişindäki ösüşi subutnamalara esaslanýan usulda yzarlamagy goldamakdan ybarat boldy.

Bu duşuşyk Türkmenistanyň 2027-nji ýylda Durnukly ösüş boýunça Ýokary derejeli syýasy forumda hödürlenmegi meýilleşdirilýän üçünji Meýletin milli synyna taýýarlyk işleriniň bir bölegidir. Gatnaşyjylar milli we ählumumy statistika maglumat bazalarynyň arasyndaky tapawutlara syn berdiler hem-de DÖM boýunça hasabatlylyk üçin maglumatlaryň yzygiderliligini, hilini we elýeterliligini ýokarlandyrmagyň ýollaryny ara alyp maslahatlaşdylar.

Duşuşygyň dowamynda bilermenler hasabatlylykdaky boşluklar ýa-da usulyýet tapawutlary ýüze çykarylan birnäçe DÖM görkezijilerine seljerme geçirdiler. Ara alyp maslahatlaşmalar saglygy goraýyş, ýol hereketiniň howpsuzlygy, iýmit, gender hem-de howpsuz dolandyrylýan agyz suw hyzmatlary bilen bagly görkezijilere gönükdirildi. Birleşen Milletler Guramasynyň degişli agentlikleriniň halkara bilermenleri onlaýn görnüşde gatnaşyp, tehniki maslahatlary berdiler hem-de milli tagallalary goldamak maksady bilen halkara usulyýetleri we öňdebaryjy tejribeleri paýlaşdylar.

Duşuşyk milli edaralar bilen BMG-niň bilermenleriniň arasynda pudagara utgaşdyrylyşy pugtalandyrmak, maglumatlary ýygnamagy we seljermegi kämilleşdirmek, şeýle hem milli hasabatlylyk ulgamlaryny halkara ülňülerine laýyk getirmek meseleleri boýunça netijeli pikir alyşmak üçin mümkinçilik döretdi. Gatnaşyjylar aýratyn görkezijileri hasaplamagyň dowamynda ýüze çykýan kynçylyklary ara alyp maslahatlaşdylar we maglumatlaryň elýeterliligini hem-de deňeşdirilşini gowulandyrmagyň mümkinçiliklerini kesgitlediler.

Ygtybarly we öz wagtynda elýeterli maglumatlar Durnukly ösüş maksatlaryna ýetmekdäki ösüşi yzarlamak hem-de subutnamalara esaslanýan döwlet syýasatlaryny kemala getirmek üçin örän möhümdir. Milli we halkara bilermenleriň tejribesini birleşdirýän bu duşuşyk Türkmenistanyň statistika mümkinçiliklerini pugtalandyrmaga ýardam berýär hem-de ýurduň DÖM boýunça aç-açan we netijeli gözegçilik we hasabatlylyk ýöretmek baradaky ygrarlylygyny goldaýar.

Türkmenistandaky Birleşen Milletler Guramasy maglumat ulgamlaryny pugtalandyrmak, inklýuziw hyzmatdaşlygy ösdürmek we 2030-njy ýyla çenli Durnukly ösüş maksatlaryna ýetmek ugrunda utgaşdyrylan işleri ilerletmek arkaly milli hyzmatdaşlaryny goldamagy dowam etdirýär.