BSGG we UNICEF COVID-19 boýunça raýdaşlyk we hereket ediş gaznasy arkaly pandemiýa jogap beriş çäreleri boýunça hyzmatdaşlyk eder

NÝU ÝORK /ŽENEWA / WAŞINGTON, KOLUMBIÝA, 3-nji aprel: Bütindünýä saglygy goraýyş guramasy (BSGG) we UNICEF şu gün Birleşen milletler guramasynyň gaznasy we «Swiss Philanthropy Foundation» (Şweýsariýa haýyr-sahawat gaznasynyň) goldawy bilen esaslandyrylan, taryhy gymmatlygy bolan COVID-19 boýunça Raýdaşlyk we hereket ediş gaznasy arkaly COVID-19-a jogap beriş çäreleri boýunça bilelikdäki iş ugrunda hyzmatdaşlyk etmek babatda şertnama gol çekilendigini habar berdiler.

COVID-19 boýunça Raýdaşlyk we hereket ediş gaznasy Bütindünýä saglygy goraýyş guramasynyň (BSGG) Taýýarlyk we hereket etmek boýunça strategik meýilnamasyna laýyklykda amala aşyrylýan deňäp bolmajak global hereket ediş çärelerine goldaw bermek maksady bilen döredildi. Bu ylalaşyga laýyklykda, häzirki wagtda 127 million ABŞ dollaryndan gowrak möçberden ybarat Gaznanyň birinji bölegi dünýäniň ejiz çagalary we ýerli jemgyýetleri bilen işini maliýeleşdirmek üçin UNICEF-e geçiriler.

Bütindünýä saglygy goraýyş guramasynyň baş müdiri doktor Tedros Adhan Gebreýsus: «COVID-19 görlüp-eşidilmedik pandemiýa bolup, ol gyssagly çäre görmek üçin adatdan daşary global raýdaşlygy talap edýär» - diýip aýtdy. – «Men UNICEF-iň Raýdaşlyk we hereket ediş gaznasyna goşulandygyna begenýärin. UNICEF-iň serişdeleri ýygnamak we maksatnamany durmuşa geçirmek boýunça toplan tejribesi sebäpli, bu hyzmatdaşlyk adamlary halas etmek ugrunda ýakyn hyzmatdaşlygymyza goşant goşar».

Bu gazna tarapyndan toplanan serişdeler, beýleki işler bilen bir hatarda, COVID-19-yň öňüni almak, ony ýüze çykarmak we bejermek maksady bilen, ýerli jemgyýetleri enjamlaşdyrmak we lukmançylyk işgärlerini taýýarlamak üçin ulanylar. Bu ýurtlara saglygy goraýyş mümkinçiliklerini giňeltmäge we COVID-19-yň, esasan hem, aýallar, çagalar we ejiz jemgyýetçilik toparlary üçin jemgyýetçilik täsirini azaltmaga ýardam berer. Mundan başga-da, ol balaglaryň geçirilmegini hem-de bejeriş usullaryny we öňüni alyş sanjymlaryny döretmek işlerini çaltlaşdyrar.

Bu bilelikdäki tagallanyň esasy hyzmatdaşy hökmünde, UNICEF ejiz ýurtlardaky maşgalalaryň we jemgyýetleriň bu hereket ediş çäreleri bilen doly üpjün edilmegi we suw, sanitariýa we arassaçylyk, şeýle hem ýokançlara garşy göreşmek boýunça beýleki öňüni alyş çäreleri bilen üpjün edilmegini ýola goýmagy ugrunda tiz hereket etmek işine ýolbaşçylyk eder. UNICEF, şeýle hem, çagalara, terbiýeçilere we mugallymlar we saglygy goraýyş işgärleri ýaly adamlar bilen gönüden-göni işleýän jemgyýetçilik işgärlerine ýerli jemgyýetler bilen işlemek boýunça maksatnamalarynyň we ýurt meýilnamalarynyň çäklerinde ylmy taýdan esaslandyrylan teklipleriň üsti bilen goldaw berer.

UNICEF-iň ýerine ýetiriji direktory Genrietta For: «Bu adatdan daşary ýagdaý bolup, ol adatdan daşary hereketleri talap edýär we bize global ýygnanyşyk - şahsyýetleriň, korporasiýalaryň, gaznalaryň, hökümetleriň we beýleki guramalaryň gatnaşmagy zerur» - diýip aýtdy. – «UNICEF Raýdaşlyk we hereket ediş gaznasyna goşulmakdan hoşal. Bu saglygy goraýyş we arassaçylyk ulgamlaryny berkitmek boýunça tagallalarymyzy işjeňleşdirer we iň ejiz maşgalalary eýýäm aşa köp ýüklenen saglyk ulgamlaryna bolan COVID-19-yň zynjyrly täsirinden goramaga kömek eder.»

Ýygnalan serişdeler global hereket ediş çäreleriň meýilnamasyna laýyklykda sarp ediler we zerurlyklaryň iň köp bolan ýerine ugradylar. Bütindünýä saglygy goraýyş guramasynyň görkezmesi boýunça çeşmeleriň gönüden-göni aşakdaky guramalara paýlanmagyna garaşylýar:

• Bütindünýä saglygy goraýyş guramasyna - ýokanjyň ýaýramagyny yzarlamak, meseleleri we zerurlyklary bahalandyrmak, ilkinji bejeriş işgärlerini şahsy gorag enjamlary bilen enjamlaşdyrmak, dünýäniň ýurtlarynda synag üçin barlaghana gurallarynyň we barlaglary geçirmek üçin enjamlaryň elýeterliligini üpjün etmek we ýerli jemgyýetlere we adamlar bilen gönüden-göni işleýän şahslara iň täze tehniki gollanmalar barada habar bermek üçin.

• UNICEF-e - bütin dünýädäki çagalara we maşgalalara COVID-19-yň ýaýramagynyň öňüni almak üçin, ylmy taýdan täzelenen maglumatlaryň we BSGG-niň iň soňky görkezmeleriniň, şeýle hem ýerli degişli maglumatlaryň berilmegini üpjün etmek; suw, sanitariýa we arassaçylyk, şeýle-de ýokançlygyň öňüni almak we oňa garşy göreşmek ugrunda esasy çäreleri üpjün etmek arkaly ejiz ýurtlary goldamak; we ejiz maşgalalar we çagalar üçin saglygy goraýyş hyzmatlarynyň elýeterliligini üpjün etmek üçin.
• CEPI (Epidemiýalara taýýarlyk ugrunda innowasiýalar boýunça koalisiýa) COVID-19-a garşy göreşmek ugrunda barlaglaryň geçirilmegini we täze sanjymlaryň gözlenilmegini maliýeleşdirýän esasy hyzmatdaş bolup, ol BSGG bilen ýakyndan hyzmatdaşlyk edýär.

COVID-19 boýunça Raýdaşlyk we hereket ediş gaznasy BMG-niň ýüztutmasy boýunça BMG gaznasy we Şweýsariýa haýyr-sahawat gaznasy tarapyndan döredildi we üç hepde ozal öz işine başlady. Bu şahsyýetleriň we guramalaryň BSGG-niň global pandemiýa tagallalaryna gönüden-göni goşant goşmagynyň ýeke-täk usulydyr. Şu güne çenli, bu gazna dünýäniň dürli künjeklerinden 219000-den gowrak adamdan, şeýle hem 90-dan gowrak halkara kompaniýalardan we guramalardan 127 million ABŞ-nyň dollaryny toplady ýa-da aldy. Mundan başga-da, bu hyzmatdaşlyk pandemiýanyň tiz we uzak möhletli netijelerine garşy göreşmekde utgaşdyrmak, hyzmatdaşlyk we birek-birege goldaw bermek ugrunda BMG guramalarynyň arasyndaky raýdaşlygyň giň beýan etmesi bolup durýar.

BMG gaznasynyň prezidenti we ýerine ýetiriji direktory Elizabet Kuzens: «Global hyzmatdaşlyga hiç haçan şundan gyssagly zerurlyk bolmandy» - diýip aýtdy. «COVID-19 pandemiýasy ýokanjyň ýaýramagynyň öňüni almakda hemmämiziň rol oýnap biljekdigimizi görkezýär. Raýdaşlyk we hereket ediş gaznasyna dünýäniň dürli künjeklerinden COVID-19 babatda bildirilen ajaýyp jomartlyk BSGG, UNICEF, CEPI we olaryň hyzmatdaşlaryna adamlary halas etmek, esasan hem iň ejiz jemgyýetleri goldamak we sanjymlaryň döredilmegini çaltlaşdyrmak ugrunda ýardam berer.»

###

Redaktorlar üçin bellikler

UNICEF barada

UNICEF dünýäde iň kyn ýagdaýdaky çagalara kömek bermek üçin, iň meseleli ýerlerde işleýär. 190 ýany ýurtda we araçäkde işläp, biz çagalar üçin, ähli adamlar üçin gowy dünýäni gurmak ugrunda işleýäris.

BSGG barada

Bütindünýä saglygy goraýyş guramasy Birleşen milletler guramasynyň ýöriteleşdirilen edarasy bolup, ol saglygy goraýyş meseleleri bilen işleşýär. Bu hökümetara guramasy bolup, ol, adatça, saglygy goraýyş ministrlikleriniň üsti bilen agza döwletler bilen hyzmatdaşlykda işleýär. Bütindünýä saglygy goraýyş guramasy global saglyk meselelerini dolandyrmak, saglygy goraýyş ugrunda barlaglary geçirmegiň gün tertibini düzmek, kadalary we ülňüleri kesgitlemek, hakyky subutnamalara esaslanýan syýasatlary düzmek, ýurtlara tehniki kömek bermek, şeýle-de saglygy goraýyş ugrunda ýörelgelere gözegçilik etmek we baha bermek üçin jogapkärdir. Has giňişleýin maglumat www.who.int sahypasynda elýeterlidir.

Birleşen milletler guramasynyň gaznasy barada

BMG-niň gaznasy Birleşen milletler guramasyna global ösüşe ýetmek we derwaýys meseleleri çözmek üçin zerur pikirleri, adamlary we çeşmeleri özüne çekýär. Biziň aýratynlygymyz uzak möhletleýin üýtgeşmeleri üpjün etmek we adamzadyň öňünde durýan iň uly meseleleriň innowasion çözgütlerini gözlemek maksady bilen hyzmatdaşlygy ösdürmekden ybarat. Goşmaça maglumat www.unfoundation.org sahypasynda elýeterlidir.

Goşmaça maglumat üçin aşadakylara ýüz tutuň:

Jenap Kurtis Kuper (Kurtis Cooper), UNICEF, tel.: +19174761435,

el. poçta: kacooper@unicef.org

Hanym Serena Jiwani (Serena Jiwani), BMG gaznasy, tel.: +12028542355,

el. poçta: sjiwani@unfoundation.org

Jenap Tarik Ýaşarewiç (Tarik Jasarevic), BSSG, tel.: +41793676214,

el. poçta:  jasarevict@who.int

Hanym Margaret Harris (Margaret Harris), BSSG, tel.: +41 79 290 6688, 

el. poçta: harrism@who.int