Ýewropa immunizasiýa hepdeligi 2023 – sizi we siziň ýakynlaryňyzy goramak üçin her bir doza möhümdir

Bu waka, Bütindünýä Saglygy Goraýyş Guramasynyň “Öwezini doldurmagyň” ýyly diýip atlandyrýan mowzugynyň esasydyr we onuň dowamynda biz bütin dünýäde çagalara sanjym etmeklik derejesiniň peselmegi bilen baglanyşykly meseleleriň çözgüdini tapmalydyrys. Şeýlelik bilen, BSGG-niň Türkmenistandaky ýurt boýunça edarasy Ýewropa Bileleşigi, BMG-niň düzümleýin edaralary we Türkmenistanyň Saglygy goraýyş we derman senagaty ministrligi bilen bilelikde Ýewropa immunizasiýa hepdeligini başlaýar. Bu ýyl tapawutly boldy, çünki Bütindünýä Saglygy Goraýyş Guramasy “Hemmeler üçin saglyk” mowzugy bilen 75 ýyllygyny belleýär.

Immunizasiýa jemgyýetiň saglygyna güýçli täsirini ýeitrýän iň möhüm çäreleriň biridir. Soňky ýyllarda biz  global immunizasiýa gurşawynyň pese düşmegine şaýat bolduk. Munuň esasy sebäbi COVID-19 pandemiýasynyň ýetiren täsirleridir, ýöne biz bu keseliň netijelerine garşy göreşenimizde, sanjymlar bilen öňüni alyp boljak beýleki kesellere gözegçilik etmek we olary ýok etmek ugrunda edýän tagallalarymyzy dowam etdirmegimiz möhümdir. Şonuň üçin biziň saglygy goraýyş ulgamlarymyz sanjymlar bilen öňüni alyp boljak keselleri yzarlamakda hüşgär bolmalydyrlar we biz adamlara her bir sanjymyň adamlary halas etmek, özümizi we bize ýakyn adamlarymyzy goramak üçin möhümdigini ýatlatmalydyrys. Biziň maksadymyz sanjym gurşawyny, pandemiýadan öňki döwürdäki derejesine ýetirmekdir we bu mümkindir. 2022-nji ýyldan bäri Ýewropa sebiti immunizasiýanyň netijesinde poliomiýelit keselinden azat sebite öwrüldi.

“Türkmenistan sanjym etmekde ägirt uly ösüş gazandy - BSGG-niň maslahat berşi ýaly 95% -den hem gowrak, bu bolsa immunizasiýanyň derejesini ýokarlandyrmakda möhüm bir ädimdir. 2016-njy ýylda adamyň papilloma wirusyna (APW) garşy sanjymlarynyň sanjym meýilnamasyna girizilendigini hem belläp geçmegimiz möhümdir, şeýlelik bilen oglanlara we gyzlara ýatgy we beýleki düwnük kesellerinden goranmak üçin APW sanjymyny almak teklip edildi. 2019-njy ýylda pnewmokok we rotawirus ýokanjyna garşy sanjymlar girizildi, bu ýene-de bir uly öňegidişlikdir "- diýip, jenap Ýegor Zaýsew, BSGG-niň Türkmenistandaky wekili, ÝB-niň maliýe goldawy bilen guralan metbugat ýygnagynda aýtdy.

Türkmenistanyň Hökümeti, BMG-niň düzümleýin edaralary we ÝB bilen bilelikde hyzmatdaşlyk edip, sanjymlar arkaly biz Türkmenistanda jemgyýetiň saglygyny gowulaşdyrmak we goramak ugrunda uly ösüş gazandyk.

Türkmenistan, Ýewropa Bileleşiginiň we BSGG-niň, saglygy goraýyş hyzmatlarynyň hemmeler üçin elýeterli bolmagyny üpjün etmek maksady bilen, immunizasiýa, şeýle hem saglygy goraýyş ulgamlaryny sanlylaşdyrmak üçin alnyp barylýan işlere itergi bermek üçin bilelikde maliýeleşdirýän 4 ýyllyk taslamasyndan peýdalanýan Merkezi Aziýa ýurtlarynyň bäşisiniň biridir. Taslamanyň serişdeleri COVID-19 garşy immunizasiýa meýilnamalaryny işläp düzmek we durmuşa geçirmek, sanjym bilen meşgullanýan saglygy goraýyş işgärlerini we hünärmenleri taýýarlamak, hem-de immunizasiýa degişli maglumat ulgamlaryny güýçlendirmek üçin ulanylýar.

Bu üstünlikleriň hemmesini nazara alyp, dowamatly hyzmatdaşlygyň üsti bilen COVID-19 pandemiýasynyň ýetiren täsirlerini ýeňip geçjekdigimize we biziň çagalary we ululary howply kesellerden goramakda her ýurtda we sebitde gazanan üstünliklerimiziň hiç kimini ünsden düşürmän dowam etjekdigine ynanýarys.