Konteýner gatnawlara gözegçilik etmek boýunça global maksatnamasy Türkmenistanyň Döwlet gümrük gullugynyň işgärleri üçin strategiki haryt söwdasy we eksport gözegçiligi barada habardarlygy ýokarlandyrmak boýunça onlaýn seminar geçirýär

Bu seminar 2020-nji ýyla meýilleşdirilen we Türkmenistanyň Döwlet gümrük gullugynyň işgärleriniň strategiki haryt söwdasy we eksport gözegçiligi, şeýle hem häzirki zaman gümrük gözegçiliginiň usullaryny ulanmak maksady bilen, Türkmenistan üçin Konteýner gatnawlara gözegçilik etmek boýunça global maksatnamany uzakdan öwrenmek boýunça çäreleriň bir bölegidir.

Okuwyň açylyş dabarasynda BMG-niň Neşeler we jenaýatçylyk boýunça müdirliginiň sebit maksatnamasynyň utgaşdyryjysy jenap Batyr Geldiýew Daşary işler ministrligine we Türkmenistanyň Döwlet gümrük gullugyna bu çäräni Aşgabatdaky gümrük merkezinde we Türkmenbaşynyň halkara deňiz portunda onlaýn görnüşde geçirendigi üçin minnetdarlyk bildirdi. Şeýle hem, ol COVID-19 ýokanjynyň dünýäde ýaýramagy bilen baglanyşykda, Konteýner gatnawlara gözegçilik etmek boýunça global maksatnamasynyň häzirki ýagdaý babatda okuw strategiýasyny işläp düzendigini we: (1) uzak aralyk okuw modullaryny, (2) nazary onlaýn okuwlaryny we (3) guramaçylykly jenaýat toparlary tarapyndan harytlaryň üpjünçilik zynjyrynyň bikanun maksatlar üçin ulanylmagynyň öňüni almak we maksatnamanyň dowamlylygyny üpjün etmek üçin uzak aralyk okuw programmalaryny uýgunlaşdyrandygyny aýratyn belledi. 

BMG-niň Neşeler we jenaýatçylyk boýunça müdirliginiň tejribeli tälimçileriniň goldawy bilen, türkmen gatnaşyjylary strategiki söwda gözegçiligi, BMG-niň Howpsuzlyk geňeşiniň degişli karary we onuň durmuşa geçirilişi, köpçülikleýin gyryş ýaraglary, sanksiýalar we embargolar baradaky bilimlerini giňeltdiler we töwekgelçilik görkezijilerini hem-de galplygyň görnüşlerini kesgitlemek boýunça endiklerini ösdürdiler.

Konteýner gatnawlara gözegçilik etmek boýunça global maksatnamanyň Merkezi Aziýa üçin sebit segmenti Ýaponiýanyň Hökümeti we ABŞ-nyň Halkara neşe serişdelerine garşy göreş we hukuk goraýyş boýunça döwlet departamentiniň býurosy, şeýle hem Eksport gözegçiligi we serhet howpsuzlygy maksatnamasy (EXBS) tarapyndan maliýeleşdirilýär.