Press reliz

BMG Turkmenistan zenan liderler bilen diplomatiýa boýunça maslahat geçirdi

06 mart 2025

Aşgabat, Türkmenistan – 2025-nji ýylyň 5-nji marty – Halkara zenanlar güni mynasybetli BMG-niň Türkmenistandaky edarasy BMG-niň binasynda “Häzirki zaman diplomatiýasy: zenan liderler bilen dialog” atly maslahat geçirdi. Çärä diplomatiýa ulgamyndaky zenan ýolbaşçylar, jemgyýetçilik guramalaryň wekilleri, zenan telekeçiler we ýaşlar gatnaşyp, zenanlaryň diplomatiýada, parahatçylygy döretmekde we ýolbaşçylykdaky orny barada gürleşdiler.

Maslahaty BMG-niň Türkmenistandaky Hemişelik utgaşdyryjysy jenap Dmitriý Şlapaçenko alyp bardy. Maslahatyň dowamynda diplomatiýa ýolunda karýera mümkinçilikleri, ýolbaşçylykdaky kynçylyklary ýeňip geçmek we zenanlaryň parahatçylyk döredijilikdäki orny ýaly esasy temalar gozgalyp geçildi.

Maslahata gatnaşan wekilleriniň hatarynda jenap Jalpa Ratna, BMG-niň Çagalar Gaznasynyň (ÝUNISEF) Türkmenistandaky wekili; hanym Beata Peksа, Ýewropa Bileleşiginiň Türkmenistandaky ilçisi; hanym Madhumita Hazarika Bhagat, Hindistanyň Türkmenistandaky ilçisi; hanym Çynar Rustamowa, Türkmenistanyň ÝUNESKO işleri boýunça Milli toparynyň jogapkär sekretary; we hanym Gülşat Ýusupowa, Türkmenistanyň Daşary işler ministrliginiň Halkara gatnaşyklar institutynyň rektory bardy.

Maslahatda çykyş edenler öz tejribeleri, ýüzbe-ýüz bolan kynçylyklary we gazanan üstünlikleri bilen paýlaşyp, ýaş zenanlary halkara gatnaşyklar we diplomatiýa ugurlarynda karýera gurmaga höweslendirdiler. Bu çäre ýolbaşçylykda gender deňliginiň ähmiýetini belläp, has açyk, durnukly we parahat geljek gurmak üçin bilelikdäki tagallalaryň zerurdygyny nygtady.

“Diplomatiýada zenanlar halkara hyzmatdaşlygy, parahatçylygy we durnukly ösüşi pugtalandyrmakda möhüm rol oýnaýarlar. Bu dialog täze nesil zenan ýolbaşçylary höweslendirmek üçin platforma bolup hyzmat edýär” diýip, jenap Şlapaçenko açylyş sözünde belledi.

Dünýäde ýolbaşçylyk we karar kabul etmekde gender deňligini gazanmak ugrunda tagallalar dowam edýärkä, bu maslahat diplomatiýada zenanlaryň hukuklarynyň giňeldilmeginiň möhümdigini ýene bir gezek ýüze çykardy. Zenanlaryň seslerini güýçlendirip, halkara gatnaşyklarda mümkinçilikleri döredip, BMG-niň Türkmenistandaky edarasy zenan ýolbaşçylary goldamaga we adalatly, deň hukukly dünýäni gurmaga goşant goşmaga ygrarly bolmagynda galýar.