BMGÖM-iň, BMG-niň Söwda we ösüş boýunça maslahatynyň we Türkmenistanyň Hökümetiniň arasynda eksport we import amallarynyň sanlaşdyrylmagyny goldamak babatda özara düşünişmek Ähtnamasy

Dabaranyň dowamynda Premýer-ministriň orunbasary we Türkmenistanyň Daşary işler ministri jenap Raşid Meredow, BMG-niň Baş sekretarynyň kömekçisi, BMGÖM-iň Ýewropa we GDA boýunça kömekçi dolandyryjysy we sebitleýin müdiri hanym Mirjana Spoljaric Egger we BMG-niň Baş sekretarynyň kömekçisi, UNCTAD-yň Baş sekretary jenap Mukhisa Kituyi Türkmenistanyň Hökümetiniň, BMGÖM-iň we UNCTAD-yň arasyndaky hyzmatdaşlygy dowam etdirmek baradaky bilelikdäki ygrarlylygy tassyklady.

Bu Ähtnamanyň maksady umumy gyzyklanýan ugurlarda taraplaryň arasyndaky hyzmatdaşlygy güýçlendirmekden ybarat. “Eksport-import amallary üçin “bir penjire” ulgamy” atly bilelikdäki taslamanyň çäginde gyzyklanýan taraplar sanlaşdyrmagy güýçlendirmek, pudagara hyzmatdaşlygy üçin işewürlik amallaryny ýönekeýleşdirmek we Türkmenistanyň dünýä ykdysady giňişligindäki ornuny berkitmek ugrunda işlär.

BMG-niň Baş sekretarynyň kömekçisi, BMGÖM-iň Ýewropa we GDA boýunça kömekçi dolandyryjysy we sebitleýin müdiri hanym Mirjana Spoljaric Egger şeýle belledi:

“Bu Özara düşünişmek Ähtnamasy taraplaryň arasynda ýola goýlan netijeli hyzmatdaşlyga esaslanýar, şeýle-de onuň geljegi uly: ol gümrük hyzmatlaryny sanlaşdyrmak ugrundaky goldawy dowam etdirmek üçin BMGÖM-iň Türkmenistanyň Hökümeti we UNCTAD bilen hyzmatdaşlygyny pugtalandyrmaga kömek eder.”