BMG-niň Hemişelik utgaşdyryjysy Hazar Deňziniň gününe bagyşlanan maslahata gatnaşdy

Maslahat Hazar deňziniň durnukly ösüşini we daşky gurşawyny goramak meselelerini ara alyp maslahatlaşmak we hyzmatdaşlyk etmek üçin Türkmenistanyň ministrlikleriniň we pudaklaýyn dolandyryş edaralarynyň, şeýle hem, daşary ýurtlaryň hem-de halkara guramalaryň wekillerini bir ýere jemledi.

Maslahata gatnaşyjylar daşky gurşawy goramak boýunça halkara hyzmatdaşlyk, Hazar deňziniň ösümlik we haýwanat dünýäsini goramak baradaky milli kanunçylygyň berjaý edilmegi, Deňiz gurşawyny goramak boýunça Tähran konwensiýasynyň durmuşa geçirilmegi, şeýle hem, parahatçylyk we dostluk deňzi hökmünde Hazar deňziniň esasy roly ýaly möhüm meselelere ünsi jemlediler. 

Maslahatyň ahyrynda, gatnaşyjylaryň hemmesi Hazar deňziniň sebitiniň durnukly ösüşini üpjün etmek üçin bilelikde işlemegi dowam etdirjekdiklerini nygtap, daşky gurşawy goramagyň, halkara hyzmatdaşlygyň we bu möhüm deňiz ekosistemasynyň goralmagynyň möhümdigini bellediler.