Balkanabadyň ýaşlary howanyň üýtgemegi bilen baglanyşykly meseleleri ara alyp maslahatlaşmak üçin birleşdiler

Maslahat aktual daşky gurşaw meselelerini ara alyp maslahatlaşmak we ýaşlaryň howanyň üýtgemegi bilen baglanyşykly meseleleri çözmäge gatnaşmak mümkinçiligini öwrenmek üçin Balkan sebitiniň dürli künjeginden gelen ýaşlary bir ýere jemledi.

Çärä BMG-niň Türkmenistandaky Hemişelik utgaşdyryjysy jenap Dmitriý Şlapaçenko, 17 ýaşdan 35 ýaş aralygyndaky ýaşlar, DÖM-iň ýaş ilçileri, eko-aktiwistler, BMGÖM-iň wekilleri we Türkmenistanyň Daşary işler, bilim we daşky gurşawy goramak ministrlikleriniň hünärmenleri gatnaşdylar.

Açylyş dabarasyndan soň BMGÖM-iň hünärmeni Hazar deňziniň deňiz gurşawyny goramak üçin Çarçuwaly konwensiýa barada çykyş etdi.

DÖM-iň ýaş ilçileri geçenki Ýaşlar maslahatlarynyň netijeleri barada çykyş edip, çäräniň mazmunyny we esasy nukdaýnazaryny kesgitlemäge mümkinçilik berdiler.

Ikinji sessiýada maslahata gatnaşyjylar iş toparlaryna bölünip, bir wagtyň özünde aýratyn otaglarda geçirilen tematiki sessiýalara gatnaşdylar.

Maslahatyň dowamynda Hazar ekologiýa başlangyjy, energiýa pudagynda parnik gazlarynyň zyňyndylaryny azaltmak, uglerod aýak yzyny azaltmak üçin täze tehnologiýalary ornaşdyrmak we ýerli gatnaşyjylar bilen daşky gurşaw bilimi artdyrmak ýaly mowzuklar ara alnyp maslahatlaşyldy.

Hünärmenler we iş toparynyň utgaşdyryjylary gatnaşyjylara maslahatyň maksatlaryny we garaşylýan netijeleri düşündirdiler. Sessiýalaryň mowzuklaryna esaslanyp, her topar Milli Ýaşlar Beýannamasynyň deslapky nusgasyna girizmek üçin teklipler taýýarladylar.

Maslahatyň ahyrynda iş toparlarynyň ýolbaşçylary öz netijelerini hödürlediler we Milli Ýaşlar Beýannamasynyň Ýol kartasyna goşmak üçin anyk çäreleri teklip etdiler. Bu teklipler, ýaşlaryň howanyň üýtgemegine garşy göreşdäki goşandyny güýçlendirmeklige gönükdirilen geljekki hereketler we başlangyçlar üçin esas döreder.

Howanyň üýtgemegi boýunça Ýaşlar maslahaty global ekologiýa meselelerine garşy göreşde ýaşlaryň garaýyşlaryny, pikirlerini we meýilnamalaryny paýlaşmak üçin möhüm platforma öwrüldi.