BMG-niň Ösüş maksatnamasy uzak aralykdan okap bolýan wirtual okuw sapagyny açýar

BMGÖM Türkmenistanyň Ýaşlar guramasy we Türkmenistanyň Zähmet we ilaty durmuş taýdan goramak ministrligi bilen ýaşlar üçin wirtual synp otagyny açýar. Türkmen we rus dillerinde geçiriljek bu sapaklar internet ulgamyny ulanmagyň esaslary, e-poçtany açmak we ondan peýdalanmak, “Word”, “Skype” programmalarynda işlemek ýaly ugurlardan, şeýle hem iş bilen baglanyşykly meseleler, ýagny rezýume ýazmak, iş gözlemek we işe ýerleşmek boýunça maslahatlardan ybaratdyr.

Kem-kemden, bellenilip geçilen mowzuklaryň sanwyna ykjam telefonlar üçin programmalary işläp düzmek, web sahypany döretmek we maglumat tehnologiýalaryň beýleki tilsimleri, wirtual onlaýn sowatlylyk synpy ýaly has çylşyrymly mowzuklar hem giriziler. BMG-niň Ösüş maksatnamasynyň web sahypasynda Ýaponiýanyň Hökümeti tarapyndan maliýeleşdirilýän sebitleýin ýaşlar taslamasynyň çäginde birnäçe sapagyň işlenilip düzülendigi aýdylýar.

Sapaklar meýletin esasynda zehinli türkmen ýaşlary tarapyndan döredilýär. Bu topar daşary ýurt uniwersitetleriniň talyplary, “Women-Tech” toparyndan, şeýle hem “Google Developer Group” wekillerinden we beýlekilerden ybarat. Bu tapgyrda tekst görnüşindäki birnäçe sapak işlenip düzüldi we geljekde wideo sapaklaryny taýýarlamak meýilleşdirilýär.

Wirtual synpyny döretmek pikiri COVID-19 pandemiýasy bilen baglanyşykly meselä jogap hökmünde ýüze çykdy. Bu başlangyç ýaşlaryň iş gözlemek we işe ýerleşmek üçin onlaýn çeşmeleri ulanmak ukybyny ýokarlandyrmaga ýardam eder, bu bolsa, öz gezeginde, ýaşlara häzirki wagtda internet ulgamyndan ukyply peýdalanmagy talap edilýän zähmet bazarynyň bäsdeşligine gatnaşmak üçin mümkinçilik döreder. Mundan başga-da, bu taslamanyň çäginde ýaşlary öwrenmäge we bilimlerini deň-duşlary bilen paýlaşmaga höweslendirmek üçin, ýaryş geçirmek meýilleşdirilýär. Ýeňijiler baýraga eýe bolarlar, şeýle hem okuwlara, BMG-niň Ösüş maksatnamasynyň ýolbaşçylary bilen duşuşyklara we taslama tarapyndan gurnalan çärelere gatnaşmak üçin mümkinçilikler beriler.