Bosgunlaryň Bütindünýä gününde BMG-niň Ýokary komissarynyň bosgunlaryň meseleleri boýunça müdirligi bosgunlaryň Türkmenistanda saglyk, bilim we sporta goşulandygyny ykrar etdi

2020-nji ýylyň ahyry ýagdaýyna Merkezi Aziýada 7 386 bosgun we gaçybatalga gözleýän, şol sanda Türkmenistanda 21 sany bosgun bar. Olaryň köpüsi COVID-19 sanjym ýaly lukmançylyk kömegi we bilim bilen üpjün edilýär. BMG-niň Ýokary komissarynyň bosgunlaryň meseleleri boýunça müdirligi ähli bosgunlaryň saglygy goraýyş, bilim, iş üpjünçiligi we durmuş goragy ulgamlaryna doly goşulmagyny üpjün etmek üçin häkimiýetlere we beýleki hyzmatdaşlara goldaw bermegini dowam etdirer.

“2021-nji ýylda saglygy goraýyşa, mekdeplere we jemgyýetlerimize kynçylyk döredýän dowamly pandemiýa wagtynda Bütindünýä bosgunlar gününi belleýäris. Emma pandemiýa biziň bilelikde has güýçlidigimizi hem öwretdi. Okamak we işlemek mümkinçiligi berlende, bosgunlar has güýçli, has ygtybarly we has janly dünýä goşant goşmagyny dowam etdirer” – diýip, BMG-niň Ýokary komissarynyň bosgunlaryň meseleleri boýunça müdirliginiň Merkezi Aziýa boýunça wekili Hans Fridrih Şodder belledi.

BMG-niň Ýokary komissarynyň bosgunlaryň meseleleri boýunça müdirliginiň 18-nji iýunda çap eden soňky Global tendensiýa hasabatyna görä, pandemiýa garamazdan, 2020-nji ýylda uruşlardan, zorluklardan, yzarlamalardan we adam hukuklarynyň bozulmagyndan gaçýanlaryň sany 82,4 milliona ýetdi. Bu 2019-njy ýylyň ahyrynda eýýäm rekord derejä ýeten 79,5 million görkezijiniň ýene dört göterime ýokarlanandygyny aňladýar.

Bosgunlaryň Bütindünýä güni zorlukdan we yzarlamalardan gaçmaga mejbur bolan millionlarça adamyň başdan geçirenlerini ykrar etmek mümkinçiligidir. Ýöne bu jemagatlary we hoşniýetli goňşulary garşylamagyň kömegi bilen adamlaryň sagalmak, täzeden gurmak we hatda gülläp ösmek üçin güýç tapyp biljekdigini bellemegiň hem günüdir. 

Bu ýyl Bütindünýä bosgunlar güni saglyk ulgamlaryna, bilime we sporta goşulmagyň güýjüne gönükdirildi. Pandemiýadan gutulmak üçin bilelikde işlemegiň ähmiýeti sebäpli saglygy goraýyş ulgamy möhümdir. Pandemiýa zerarly millionlarça çaga üçin bilim almak mümkinçiligine päsgelçilik döräni üçin bilim ulgamy möhümdir. Adamlary jebisleşdirmek ugrunda dilleri we milletleri birleşdirýän sport ulgamy hem möhümdir. 2021-nji ýylda BMG-niň Ýokary komissarynyň bosgunlaryň meseleleri boýunça müdirliginiň we Halkara Olimpiýa we Paralimpiýa komitetleriniň goldawy bilen 29 sany bosgun türgeninden ybarat topar Tokio oýunlaryna gatnaşar.