Aşgabatda geçirilen halkara forum suw serişdelerini durnukly dolandyrmagyň uzak möhletli çözgütlerini ara alyp maslahatlaşýar
06 iýun 2019
- Şu gün Aşgabatda Merkezi Aziýada durnukly ösüş maksatlaryna (DÖM) ýetmekde suw diplomatiýasynyň ornyna bagyşlanan Halkara konferensiýasy öz işine başlady.
Bu çäre Daşky gurşawy goramak günine bagyşlanyp, suw serişdeleri boýunça milli we halkara bilermenleri, halkara edaralarynyň, şol sanda BMG-yň, ÝB-iň we Aral deňzini halas etmegiň halkara gaznasynyň (AHHG) wekillerini ýygnady. Konferensiýa esasan hem daşky gurşawy we suw serişdelerini goramak babatynda halkara hyzmatdaşlyga bagyşlandy.
Forumda Merkezi Aziýanyň suw diplomatiýasy, daşky gurşawy goramakda ýüze çykýan meseleler we Durnukly Ösüş maksatlaryna ýetmek usullary ara alyp maslahatlaşyldy.
Gatnaşyjylar Türkmenistanyň suw diplomatiýasy babatyndaky ýaňy ýakyndaky başlangyçlarynyň, onuň BMG-nyň Baş Assambleýasynyň täze kabul eden “Birleşen Milletler Guramasynyň we Aral deňzini halas etmek boýunça Halkara gaznasynyň hyzmatdaşlygy” rezolýüsiýasynyň çäklerinde Aral deňziniň meselelerini çözmäge niýetlenen başarjaň çözgütleri öňe sürmek soraglarynyň üstünde durup geçdiler.
“Ähli taraplaryň ekologiki meseleleri çözmek maksady bilen birleşmekleri, sebitleýin we global derejede ekologiki abadanlygy üpjün etmegiň netijeli mehanizmlerini işläp çykarmaga mümkinçilik berjegine men ynanýaryn”, - diýip BMG-nyň Türkmenistanda Hemişelik Utgaşdyryjysy Ýelena Panowa belläp geçdi.
Forum ähli derejelerde, şol sanda köp taraplaýyn edaralaryň gatnaşmagy bilen, suw serişdelerini durnukly dolandyrmak, daşky gurşawy goramak we klimatyň üýtgemegi bilen bagly ýüze çykýan meseleleri çözmek babatynda hyzmatdaşlygy we dialogy berkitmek ugrundaky teklipleri işläp düzmek bilen tamamlandy.
BMG-nyň bu başlangyçlar bilen meşgullanýan agentlikleri
Bu başlangyçlar arkaly biziň goldaýan maksatlarymyz
