Halkara Migrasiýa guramasy Merkezi Aziýada we Russiýa Federasiýasynda galan migrantlary kartalaşdyrmagyň netijelerini görkezýär

Daşary işler ministrliginiň, Mejlisiň, Ombudsmeniň edarasynyň, Türkmenistanyň Prezidentiniň ýanyndaky Döwlet gullugy akademiýasynyň, Milli howpsuzlyk ministrliginiň, Döwlet serhet gullugynyň, Içeri işler ministrliginiň, Baş prokuroryň, Adalat ministrliginiň, Döwlet gümrük gullugynyň, Döwlet migrasiýa gullugynyň, Zähmet we ilaty durmuş taýdan goramak ministrliginiň, Döwlet, hukuk we demokratiýa institutynyň, Bilim ministrliginiň, Saglygy goraýyş we derman senagaty ministrliginiň wekilleri bilen bilelikde, ýygnaga Gazagystanyň, Gyrgyzystanyň, Russiýa Federasiýasynyň, Täjigistanyň we Özbegistanyň döwlet edaralary, ilçihanalar, halkara we jemgyýetçilik guramalarynyň wekilleri hem gatnaşdy.

Tegelek stol Şweýsariýanyň Ösüş we hyzmatdaşlyk gullugynyň maliýe goldawy bilen «Merkezi Aziýada we Russiýa Federasiýasynda COVID -19 pandemiýasynyň durmuş-ykdysady netijeleriniň täsirini azaltmak» atly Halkara Migrasiýa guramasynyň Sebitleýin taslamasynyň çäginde geçirildi.

Çäräni başlap, Merkezi Aziýa boýunça Halkara Migrasiýa guramasynyň sebitleýin utgaşdyryjysy jenap Zeýnal Hajyýew: «Halkara Migrasiýa guramasy durmuş-ykdysady ýa-da kanuny ýagdaýyna garamazdan, ähli migrantlar üçin, esasan, pandemiýada şertlerinde lukmançylyk, durmuş we beýleki hyzmatlaryň deň derejede elýeter bolmalydygyna ynanýar» diýip belledi.

Duşuşyga gatnaşyjylar migrantlaryň hereketlerini hasaba alyş ulgamy bilen tanyşdylar, beýleki ýurtlarda galan we gaýdyp gelýän migrantlary kartalaşdyrmagyň netijeleri görkezildi, gatnaşyjylar gaýdyp gelýän we agyr ýagdaýa düşen migrantlar barada maglumaty ýygnamak boýunça tejribe alyşdy, COVID-19 şertlerinde migrantlaryň zerurlyklaryny we gowşaklygyny bahalandyrmak boýunça hasabaty öwrendi. Interaktiw we toparlaýyn maslahataşmalaryň dowamynda gatnaşyjylar maglumatlary ýygnamagyň usulyýetini, gözleg geçirmegiň usullaryny ara alyp maslahatlaşdy we migrantlaryň hereketine gözegçilik etmegiň usullary bilen tanyşdy.

Duşuşygyň ahyrynda jenap Hajyýew bu çärä gatnaşandygy üçin hemmelere minnetdarlyk bildirdi we Şweýsariýanyň Ösüş gullugyna, Gazagystanyň, Gyrgyzystanyň, Russiýa Federasiýasynyň, Täjigistanyň, Türkmenistanyň we Özbegistanyň Hökümetlerine bu başlangyjy durmuşa geçirmekde berlen goldawy üçin aýratyn minnetdarlygyny beýan etdi.