ÝUNISEF bütin ýurt boýunça mekdepleriň howpsuzlygyna, tebigy betbagtçylyklaryň töwekgelçiligini azaltmaga, howanyň üýtgemegine we pandemiýa baha bermek boýunça basgançaklaýyn okuwlary geçirdi

Okuwlar mekdeplerdäki çagalar üçin arassa we howpsuz okuw gurşawyny üpjün etmek üçin gatnaşyjylaryň mekdepleriň howpsuzlygyna baha bermegiň usulyýeti, şeýle-de howanyň üýtgemegi we tebigy betbagtçylyklaryň töwekgelçiligini azaltmak hakynda habarlylygyny ýokarlandyrmaga gönükdirildi. Ýurduň taýýarlylygyny we onuň dowam edýän pandemiýa garşy jogap berme mümkinçiliklerini goldamak maksady bilen, adatdan daşary ýagdaýlarda pandemiýanyň öňüni alma we gender meseleleri boýunça çäreler ýaly mowzuklar bilen okuw modullarynyň üsti ýetirildi. Okuwlar oňa gatnaşyjylara bar bolan töwekgelçilikleri dolandyrmak boýunça öz tejribelerini paýlaşmaga, okuwçylaryň janyny goramaga we olaryň durnuklylyk boýunça endiklerini ýokarlandyrmaga gönükdirilen howanyň üýtgemeginiň netijelerini peseltmek we tebigy betbagtçylyklaryň töwekgelçiligini azaltmak boýunça degişli çäreleri ara alyp maslahatlaşmaga mümkinçilik döretdi.

“Bilim pudagynda uzak möhletleýin hem netijeli hyzmatdaşlyk we bu okuwlary geçirmekde beren goldawlary üçin Türkmenistanyň Daşary işler we Bilim ministrliklerine minnetdarlygymy bildirmek isleýärin. Olar mugallymlara we okuwçylara adatdan daşary ýagdaýlarda howpsuzlygy we saglygy üpjün etmek üçin zerur bolan bilimleri we endikleri bermek üçin işlenilip düzüldi”, diýip ÝUNISEF-iň Türkmenistandaky wekili Kristin Weýgand aýtdy.

ÝUNISEF mekdepleriň howpsuzlygyna baha bermek we mekdeplerde tebigy betbagtçylyklaryň töwekgelçiligini azaltmak, şol sanda howanyň üýtgemegi boýunça ýagdaýlary bu ugurlar bilen netijeli utgaşdyrmak babatda Türkmenistandaky hyzmatdaşlary bilen işlemegini dowam edýär. ÝUNISEF howanyň üýtgemegi, daşky gurşaw we energiýa boýunça okuw maksatnamalaryny okuw prosesine doly girizmek boýunça Bilim ministrligi bilen hyzmatdaşlyk etmegini dowam edýär.

ÝUNISEF şeýle hem BMG-niň beýleki agentlikleri bilen birlikde, BMG-niň ýurt boýunça edarasy bilen Türkmenistanyň hökümetiniň arasynda gol çekilen Adatdan daşary ýagdaýlara taýýarlygy we olarda hereket etmegi utgaşdyrmakda hyzmatdaşlyk etmek boýunça Özara düşünişmek Ähtnamasyny durmuşa geçirmegiň üstünde işleýär.