Ýol hereketiniň howpsuzlygy ugrunda hyzmatdaşlyk

Duşuşygyň maksady Ýol hereketiniň howpsuzlygy boýunça hereketleriň meýilnamasynyň onýyllygynyň (2011-2020) çägindäki bäş düzüm böleginiň durmuşa geçirilişiniň netijelerini ara alyp maslahatlaşmakdan ybaratdy.

Duşuşyga Türkmenistanyň Içeri işler ministriniň orunbasarlary, Türkmenistanyň Bilim ministrliginiň, Türkmenistanyň Saglygy goraýyş we derman senagaty ministrliginiň ilkinji lukmançylyk kömegi bölüminiň, Türkmenistanyň Senagat we kommunikasiýa ministrliginiň, Türkmenistanyň Mejlisiniň, Türkmenistanyň Zenanlar birleşiginiň we beýleki guramalaryň wekilleri gatnaşdy.

Bütindünýä Saglygy goraýyş guramasynyň Türkmenistandaky ýolbaşçysy we Türkmenistanyň Içeri işler ministriniň orunbasary ýol hereketiniň howpsuzlygy boýunça bütindünýä we milli maglumaty bilen tanyşdyrdy we ýol hereketiniň howpsuzlygy ugrunda hyzmatdaşlygyň wajyplygy barada belledi.

“Ýol hereketiniň howpsuzlygy meselesi BMG-niň Baş Assambleýasynyň gün tertibinde ýer almak bilen çäklenmän, ol 2030-njy ýyla çenli döwür üçin Durnukly ösüş maksatlarynyň aýrylmaz bölegine hem öwrülmeli. Degişli ugurlaryň Durnukly ösüş maksatlaryna girizilmegi halkara jemgyýetiň bu mesele boýunça utgaşykly hereketleriň möhümligine düşünmegini aňladýar” diýip, BMG-niň Türkmenistandaky Hemişelik utgaşdyryjysy hanym Ýelena Panowa belledi.

Umumy duşuşykda ýol hereketiniň howpsuzlygyny ýokarlandyrmak we ýollary gowulandyrmak, ýol heläkçiliklerine duçar bolanlara ilkinji lukmançylyk kömegini bermek, ýol hereketiniň gatnaşyjylarynyň hereketlerini gowulandyrmak we bilim beriş edaralarynda bu meseleler boýunça hukuk bilimleriň bolmagyny üpjün etmek maksady bilen, ýol infrastrukturasynyň ülňüleri ýaly meseleleriň üstünde hem durlup geçildi. Ýol hereketiniň howpsuzlygyny gowulandyrmakda hökümete degişli bolmadyk guramalaryň we ýaşlaryň orny barada hem bellenildi.