BMG Türkmenistanda Durnukly ösüş maksatlary boýunça ýaş ilçileriniň ikinji bäsleşigini başlaýar

. Iki ýyl yzygiderlilikde geçirilýän BMG-niň bu taslamasy Türkmenistanyň Daşary işler ministrligi, Türkmenistanyň Maliýe we ykdysadyýet ministrligi tarapyndan goldanýar.

Bäsleşigiň tanyşdyrylyş dabarasyna BMG-niň Hemişelik utgaşdyryjysy we Durnukly ösüş maksatlary boýunça milli merkeziň utgaşdyryjysy ýolbaşçylyk etdi. Gatnaşanlar Türkmenistanyň Durnukly ösüş maksatlaryny milli we dünýä derejesinde durmuşa geçirmek ugrundaky işini üstünlikli öňe süren Durnukly ösüş maksatlary boýunça ilçileriň birinji toparynyň işleriniň netijeleri bilen tanyşdyryldy.

BMG-niň Hemişelik utgaşdyryjysy hanym Ýelena Panowa şeýle belledi: “Men bu bäsleşigiň Türkmenistanyň ýaşlaryny işe çekjekdigine we birleşdirjekdigine ynanýaryn, çünki olaryň gazananlary Durnukly ösüş maksatlaryna netijeli ýagdaýda ýetmäge goşant goşup biler”.

Bäsleşik 2020-nji ýylyň 12-nji martyndan 20-nji apreline çenli dowam eder. Dalaşgärler bir sany Durnukly ösüş maksady saýlamaly we öz höweslerini subut etmeli. Ýeňijiler bir ýyl möhlet bilen Durnukly ösüş maksatlary boýunça ýaş ilçiler hökmünde bellener.

Durnukly ösüş maksatlary boýunça ilçileri saýlamak prosesi:

• Gatnaşýanlar özleriniň ilçi bolmak isleýän 17 sany Durnukly ösüş maksatlarynyň birini saýlamaly we rus ýa-da iňlis dilinde höwes hatyny ýazmaly. Hatyň ady “Näme üçin men # Durnukly ösüş maksadynyň ilçisi” bolmaly we onda Durnukly ösüş maksadynyň belgisi görkezilmeli.
• Höwes haty 2020-nji ýylyň 26-njy martyna çenli sdgambassadorstkm@gmail.com e-poçta salgysyna iberilmeli we hatda adyňyz we işjeň telefon belgiňiz görkezilmeli. 
• 2020-nji ýylyň 26-njy martyndan 2020-nji ýylyň 1-nji apreline çenli dalaşgärler Türkmenistanyň Daşary işler ministrligi, Türkmenistanyň Maliýe we ykdysadyýet ministrligi we BMG-niň Hemişelik utgaşdyryjysy tarapyndan söhbetdeşlik üçin seçilip alnar.
• Söhbetdeşlikler 2020-nji ýylyň 1-nji aprelinden 2020-nji ýylyň 20-nji apreline çenli geçiriler.
• Ýeňijileriň atlary BMG-niň maglumat platformalarynda we milli metbugatda çap ediler.

Talaplar:

• Ýaş çäkleri – 18-30
• Türkmenistanyň raýaty bolmaly we Türkmenistanda ýaşamaly
• Bir sany Durnukly ösüş maksadynyň gazanylmagyna goşant goşup biljek ýaş lider bolmaly
• Rus we iňlis dillerini bilmeli (BMG-niň beýleki dillerini bilmek artykmaçlyk)
• Jemgyýetçilik ýolbaşçylygynyň, köpçüligiň öňünde çykyş etmegiň we blog ýazmagyň başarnyklary
• Global pikirlenmek we ähli adamzadyň peýdasyna hereket etmek islegi
• BMG-niň ýörelgelerine we gymmatlyklaryna ygrarlylyk