Ýokary derejeli gepleşikler Durnukly Ösüş ugrunda Parahatçylygy we Ynamy üpjün etmegiň ýollaryny şöhlelendirýär

Maslahatyň öňüsyrasynda Halkara Kongres merkeziniň açylyş dabarasy geçirilip, oňa Türkmenistanyň Prezidenti gatnaşdy we maslahatyň gatnaşyjylaryna ýüzlendi.

Hökümetiň, Birleşen Milletler Guramasynyň, Ýewropa Bileleşiginiň, Ýewropada Howpsuzlyk we Hyzmatdaşlyk Guramasynyň, Garaşsyz Döwletleriň Arkalaşygynyň we ýurtdaky diplomatik wekilhanalaryň wekilleri ýokary derejede çykyş edip, adamlara gönükdirilen maksatnamalar, goşulyşmak we hyzmatdaşlygy güýçlendirmek arkaly parahatçylygy we ynamy üpjün etmegiň ýollary barada öz garaýyşlaryny hödürlediler.

BMG-niň Hemişelik utgaşdyryjysynyň w.ý.ý. hanym Kristin Weýgand: “Durnukly ösüş ugrunda 2030-njy ýyla çenli Gün tertibine girizilen “hiç kimi yzda galdyrmazlyk” esasy ýörelgesiniň durmuşa geçirilmeginiň Parahatçylyk we ynam düşünjeleri bilen baglanyşyklydygyna berk ynanýaryn” – diýip belledi.

Ýokary derejeli maslahatyň çäginde Türkmenistanyň Hökümeti bilen halkara guramalarynyň arasynda şu resminamalara gol çekildi: Bilim ministrligi bilen ÝHHG-niň Azlyklar baradaky Ýokary komissarlygynyň edarasynyň arasynda köp dilli we köp medeniýetli hyzmatdaşlyk boýunça Özara düşünişmek barada Ähtnama; 2021-2023-nji ýyllar üçin hereket meýilnamasy boýunça Türkmenistan bilen ÝUNESKO-nyň arasynda Özara düşünişmek barada Ähtnama; Türkmenistanyň Saglygy goraýyş we derman senagaty ministrligi bilen ÝUNISEF-iň Sebitleýin iýmit platformasy baradaky ylalaşygy.

Ýokary derejeli forumdan soň Parahatçylyk we howpsuzlyk, Durnukly ykdysadyýet we daşky gurşaw, Hukugyň hökmürowanlygy we sosial adalat boýunça üç sany umumy mejlis bilelikde geçirildi. Geçirilen mejlisde Hökümetden we halkara hyzmatdaşlardan çykyş edenler özara düşünişmeklige, halkara hukugyna hormat goýmaklyga hem-de parahatçylygy we howpsuzlygy goramaklyga, adam hukuklarynyň berjaý edilmegine we durnukly ösüşi höweslendirmäge esaslanan köptaraplaýynlygy ýokarlandyrmak arkaly parahatçylygy we ösüşi ýola goýmak ugrunda bilelikde işlemek baradaky özara borçnamalary täzelediler.

Umuman, gatnaşyjylar şular ýaly gepleşikleriň hemmeler üçin parahatçylyk we abadançylyk ugrunda umumy ösüş maksatlaryna ýetmekde has güýçli we netijeli hyzmatdaşlyga aýgytly itergi berýändigi bilen ylalaşdylar.